Këngëtarja e famshme Shakira do të nisë një turne botëror madhështor për gjysmën e parë të vitit 2025.
Turneun ajo e ka quajtur “Las mujeres ya no lloran World Tour.”
Këngëtarja pritet të performojë në 40 koncerte, duke filluar në Brazil më 11 shkurt.
Shfaqjet e para përfshijnë qytete të Amerikës Latine si Lima, Santiago de Chile dhe Buenos Aires, ku biletat janë tashmë të shitura.
Ajo do të zhvillojë pesë koncerte në vendlindjen e saj Kolumbi dhe dhjetë të tjera në Meksikë, duke përfshirë gjashtë koncerte në stadiumin GNP Seguros në Mexico City, ku kapaciteti prej 65,000 vendesh është pothuajse i plotë.
Përtej Brazilit, turneu do të ndalet në qytetet kryesore të Amerikës Latine. Në Peru, Kili dhe Argjentinë, biletat për koncertet në Lima, Santiago dhe Buenos Aires janë shitur që tani, duke konfirmuar pritjen e madhe të fansave.
Në Meksikë, shfaqjet në Guadalajara dhe Monterrey janë ende të disponueshme për disa data, ndërsa në Mexico City, biletat janë pothuajse të gjitha të shitura për datat nga 19 deri më 28 mars.
Pas një pauze të shkurtër pas koncertit të fundit në Mexico City më 28 mars, Shakira do të rikthehet më 13 maj në SHBA për fazën e dytë të turneut.
Ajo do të mbajë 17 koncerte në qytete si Charlotte, Miami, Boston, Washington, Las Vegas dhe San Francisco. Kjo fazë e turneut do të zgjasë deri në fund të qershorit.
Shakira ka angazhuar profesionistë të nivelit të lartë për të garantuar një performancë të shkëlqyer.
Sipas gazetarit Luis Magaña nga El Universal, artistja ka punësuar ekipin e zërit të Taylor Swift, koreografin e fundit të Beyoncé dhe artistët grafikë të Cirque du Soleil.
Ky staf i larmishëm synon t’i sjellë spektatorëve një shfaqje të paharrueshme.
Për të siguruar performancën e saj, Shakira do të udhëtojë me një ekip të posaçëm, përfshirë trajnerin vokal, mjekun dhe nutricionistin.
Në çdo koncert, ajo ka kërkuar tre dhoma të ndara për grim dhe veshje, pritjen e miqve dhe një tjetër afër skenës për ndërrimin e shpejtë të veshjeve.
Ajo kërkon gjithashtu që këto ambiente të kenë ujë të distiluar dhe temperatura të qëndrueshme prej 22°C.