Durim Bami, 47-vjeç, banues në Krujë, është ekstraduar nga Dubai dhe ka mbërritur sot në Shqipëri, pas një udhëtimi nga Dubai në Stamboll dhe më pas drejt Rinasit.
Bami është i shpallur në kërkim ndërkombëtar, pasi Gjykata e Posaçme e Shkallës së Parë Kundër Korrupsionit dhe Krimit të Organizuar, më 15 maj 2024, i ka caktuar masën e sigurisë “Arrest në burg” për veprat penale “Sigurimi i kushteve dhe i mjeteve materiale për të kryer vrasje”, Grupi i strukturuar kriminal”, “Kultivimi i bimëve narkotike”, “Kryerja e veprave penale nga organizata kriminale, ose grup i strukturuar kriminal”.
Shoqërimi nga Aeroporti i Rinasit drejt IEVP u realizua nga Forcat Operacionale të Drejtorisë së Përgjithshme të Burgjeve, në bashkëpunim me Forcën Kombëtare të Sigurisë, Forcat “Shqiponja” dhe Drejtorinë e Forcës së Posaçme Operacionale, si pjesë e operacionit ndërkombëtar të koduar “The Wanted”.
Bami është dërguar në Burgun 313, ku do të vuajë masën e sigurisë. Ky ekstradim është rezultat i bashkëpunimit të ngushtë mes Policisë së Shtetit dhe homologëve në Emiratet e Bashkuara Arabe, me shkëmbim intensiv informacioni dhe koordinim operativ.