Kryeministri Edi Rama ka njoftuar se paga minimale në Shqipëri do të rritet në 500 euro duke nisur nga data 1 janar 2026, si në sektorin publik ashtu edhe në atë privat. Deklarata u bë gjatë episodit më të ri të podkastit “Flasim”.
Rama theksoi se viti 2026 shënon fillimin e një cikli të ri rritjeje për pensionet:
“Me hyrjen e vitit të ri 2026 nis edhe historia e re e rritjes së pensioneve, të cilat do të nisin të rriten nga janari e do të dyfishohen në janar 2027, do të trefishohen në janar 2028, do të katërfishohen në janar 2029 e do të pesëfishohen në janar 2030.”
Sa i përket pagës minimale, kreu i qeverisë u shpreh:
“Më 1 janar 2026 do të rritet edhe paga minimale, tamam ashtu siç jemi zotuar. Ajo do të jetë 500 euro, qoftë në sektorin publik, qoftë në sektorin privat.”
Ndër të tjera, Rama foli edhe për shpërblimet e fundvitit për pensionistët, duke mohuar zërat se këto pagesa do të shtyheshin për vitin e ardhshëm:
“Miratuam këtë javë shpërblimin e fundvitit për pensionistët… Kush ka pension deri në 20 mijë lekë të reja do të marrë një shpërblim prej 150 euro, ndërsa ata që kanë pension mbi 20 mijë lekë të reja do të marrin 100 euro.”
Shpërblimet, sipas tij, kanë nisur tashmë të dërgohen drejt përfituesve.