Në nderim të ish-kryeministrit Fatos Nano, dita e nesërme është shpallur zi kombëtare. Më 2 nëntor, në Pallatin e Kongreseve do të zhvillohen homazhe për figurën e tij, ku pritet të marrin pjesë personalitete politike, qytetarë dhe familjarë.
Ceremonia do të nisë në orën 08:30 me pritjen e qytetarëve që dëshirojnë t’i japin lamtumirën e fundit Nanos. Në orën 11:15, një pjesëtar i familjes dhe kryeministri Edi Rama do të mbajnë fjalime, ndërsa janë ftuar edhe personalitete politike nga Kosova.
Pas homazheve, trupi i Nanos do të niset nga Pallati i Kongreseve në orën 12:05 drejt banesës së fundit në Sharrë. Familja ka kërkuar që ceremonia ortodokse të kryhet në privatësi.
Institucionet shtetërore do të ulin flamujt në gjysmë shtizë dhe në orën 12:00 do të mbahet një minutë heshtje në respekt të Nanos.
Fatos Nano, i cili ndërroi jetë dje pas problemeve kronike respiratore dhe një arresti kardiak, shërbeu tri herë si kryeministër dhe mbahet mend si një figurë kyçe e të majtës dhe e tranzicionit shqiptar.