Kryeministri Edi Rama ka reaguar sërish në lidhje me aksionin për lirimin e hapësirave publike në plazhe, duke paralajmëruar bizneset që kanë zënë bregdetin në mënyrë të paligjshme.
Përmes një postimi në rrjetet sociale, Rama ka shpërndarë pamje nga një rast në Gjirin e Lalzit, ku një subjekt është detyruar të heqë qindra çadra dhe shezlongë të vendosur në territor publik.
“A ia vlen të humbasësh gjithë këta shezlongë e çadra për të sfiduar shtetin?! Nuk e di, këta e dinë – në Lalëz gdhinë si zaptues dhe e ngrysën si të përzënë me duar në xhepa”, shkruan Rama.
Kreu i qeverisë theksoi se ky aksion është vetëm hapi i parë i një qasjeje të re ndaj bregdetit shqiptar, duke nënvizuar se hapësirat publike nuk do të jenë më pronë private: “Buzëdeti është i të gjithë shqiptarëve, jo vetëm i disa tregtarëve”.