Gjykata e Posaçme e Apelit ka caktuar datën 24 shkurt për shqyrtimin e ankimimit të kryebashkiakut të Tiranës, Erion Veliaj, i cili kërkon ndryshimin e masës së sigurisë “arrest me burg”.
Kërkesa do të shqyrtohet nga gjyqtarja Nertina Kosova, e cila do të vendosë nëse masa do të zbutet apo do të mbetet në fuqi. Apeli do të vlerësojë gjithashtu nëse plotësohen kushtet ligjore për lirimin e tij nga paraburgimi.
Ankimimi vjen pas vendimit për kalimin e çështjes për gjykim. Sipas mbrojtjes, në këtë fazë procedurale nuk ekziston më rreziku i prishjes apo manipulimit të provave, argument që konsiderohet thelbësor për lehtësimin e masës së sigurisë.
Për çfarë akuzohet Veliaj?
Struktura e Posaçme Kundër Korrupsionit dhe Krimit të Organizuar (SPAK) ka përfunduar hetimet dhe ka dërguar për gjykim dosjen në Gjykata e Posaçme e Shkallës së Parë. Sipas organit të akuzës, ndaj Veliajt rëndojnë 13 akuza, ndërsa ndaj bashkëshortes së tij, Ajola Xoxa, 12 akuza.
Nga hetimet paraprake rezulton se Veliaj dhe Xoxa, në nëntë raste të ndryshme, dyshohet se kanë përfituar në mënyrë të parregullt shuma monetare dhe pasuri të paluajtshme nga subjekte tregtare dhe organizata jofitimprurëse. Sipas SPAK, këto subjekte kanë përfituar më pas leje ndërtimi dhe fonde publike nga Bashkia Tiranë.
Prokuroria pretendon se Veliaj, në cilësinë e kryetarit të Bashkisë, ka miratuar me firmën e tij shpërndarjen e fondeve, të cilat më pas kanë përfunduar te OJF të kontrolluara nga bashkëshortja e tij dhe persona të afërt me të. Gjithashtu, sipas dosjes, dyshohet për përfitime të paligjshme në formën e pasurive të paluajtshme me vlerë të konsiderueshme.
Sipas organit të akuzës, veprimet e dyshuara përbëjnë elementë të veprës penale të parashikuar nga neni 260 i Kodit Penal, ndërsa për subjektet tregtare dhe OJF-të përmendet neni 245 i Kodit Penal, që lidhet me dhënien e përfitimeve të parregullta për shkak të detyrës.