Gjatë ditës së sotme, një pjesë e madhe e internetit u përball me ndërprerje, duke prekur platforma dhe faqe botërore, përfshirë edhe disa gazeta online në Kosovë, ku qasja dhe funksionimi i tyre u bllokuan për disa orë.
Kompania teknologjike Cloudflare, një nga shtyllat kryesore të infrastrukturës globale të internetit, ka sqaruar se nuk bëhej fjalë për një sulm kibernetik.
Shefi i teknologjisë në Cloudflare, Dane Knecht, deklaroi se problemet u shkaktuan nga një “bug latent” në sistemet e mbrojtjes ndaj bot-eve, i cili u aktivizua pas një ndryshimi rutinë në konfigurim. “Ky gabim filloi të shkaktojë kolaps në rrjet dhe degradim të gjerë të shërbimeve. Nuk ka qenë sulm,” tha Knecht, duke shtuar se kompania po punon që situata të mos përsëritet dhe u ka kërkuar falje klientëve të saj.
Cloudflare njoftoi se ka zbatuar një zgjidhje dhe shërbimet po rikthehen gradualisht në normalitet, megjithëse disa përdorues mund të përballen ende me vështirësi në qasje.
Ndërprerja e sotme vjen pak javë pas një incidenti të ngjashëm në Amazon Web Services (AWS), duke rikthyer debatet mbi varësinë globale të internetit nga disa kompani të mëdha teknologjike. Aktualisht, rreth 20% e të gjitha faqeve të internetit në botë përdorin Cloudflare.