Një shqiptar 29-vjeçar, i punësuar si përkthyes nga një bandë kriminale, është dënuar me pesë vite burg në Skoci për përfshirje në një rrjet të kultivimit të kanabisit me vlerë gati 4 milionë paund.
Afrim Krasniqi ishte rekrutuar për t’i ndihmuar anëtarët e bandës të dukeshin si pronarë të ligjshëm të pronave, duke prezantuar veten si një shtetas italian që kërkonte strehim për familjen. Bandat shqiptare shfrytëzuan shtëpi në Renfrewshire, Edinburgh, Penicuik në Midlothian, Aberdeen, Ayrshire dhe Angus për t’i kthyer ato në ferma kanabisi.
Krasniqi u kap pasi u gjurmua në një adresë në Glasgow. Hetuesit llogaritën se droga e kultivuar kishte një vlerë tregu prej 3.8 milionë paundësh. Ai kishte pranuar fajësinë para një gjyqi 15-ditor në Edinburgh për përfshirje në furnizimin me drogë të klasit B midis marsit 2021 dhe shtatorit 2023.
Gjykatësi Lord Arthurson e përshkroi Krasniqin si një “hyrës të paligjshëm” në Mbretërinë e Bashkuar, pjesë e një “ndërmarrjeje kriminale në shkallë të gjerë dhe të planifikuar me kujdes”. Për shkak të pranimit të fajësisë, dënimi fillestar prej gjashtë vitesh u uli në pesë vite.
Prokurori David McLean KC tha se Krasniqi kishte përdorur dokumente të falsifikuara identiteti për të lehtësuar marrjen e pronave me qira, ndërsa hetuesit zbuluan manipulime të matësve të energjisë elektrike dhe ferma të tjera kanabisi në St Andrews dhe Angus.
Avokati i tij, Iain McSporran KC, argumentoi se roli i Krasniqit ishte kryesisht si përkthyes, duke mos pasur ndikim në kultivimin e drogës, por duke qenë i vetëdijshëm se po ndihmonte një aktivitet kriminal. “Ai veproi në vështirësi financiare dhe mori një vendim të gabuar, tani duhet të paguajë çmimin,” tha mbrojtësi.