Përgjatë natës, rrugët dhe sheshet e Napolit u mbushën me qindra mijëra njerëz që festonin fitimin e titullit kampion. Nga Lagjet Spanjolle deri në Via Toledo, duke kaluar pranë Teatro San Carlo, Galerisë Umberto dhe sheshit Trieste e Trento, atmosfera ishte plot gëzim dhe këngë.
Megjithatë, nuk munguan aktet e vandalizmit dhe dëmtimet, megjithëse pa ndonjë incident të dhunshëm. Janë regjistruar mbi 120 të lënduar, shumica e të cilëve morën ndihmë mjekësore në pikat e asistencës të organizuara nga autoritetet për shkak të masës së njerëzve. Disa u dërguan në spital, por asnjë prej tyre nuk është në gjendje kritike.
Sheshi Bovio, vetëm disa qindra metra larg sheshit Plebisicito, u mbush me kaq shumë njerëz sa policia bashkiake u detyrua të bllokojë zonën. Nuk pati përleshje apo tensione, vetëm fishekzjarre, boriflauta dhe tymuese.
Në sheshin Trieste e Trento, pranë Plebisicit, edhe këtë vit tifozët sulmuan monumentin e famshëm të Fontanës së Karçofit, që është simbol i festave të tifozëve të Napolit. Kjo fontanë lidhet ngushtë me historinë e klubit, pasi u kërkua të ndërtohej nga Achille Lauro, ish-kryebashkiaku dhe presidenti i klubit midis viteve ’40 dhe ’60. Përpjekjet e bashkisë për të mbrojtur monumentin me barriera nuk dhanë rezultat, pasi tifozët i hoqën ato, ngjitën në monument dhe kënduan këngë, valëvitën flamujt dhe ndezën tymuese.
Në një atmosferë që kujton festimet e Vitit të Ri, shumë njerëz bënë dolli dhe tifozëve të Napolit iu bashkuan edhe turistët në qytet. Ata që nuk mbanin fanellën e Napolit, mbathën fanellat e Argjentinës apo të Boca Juniors, klubi ku luajti Maradona në fillimet e tij. Qindra mijëra njerëz filmuan momentet e festës me telefonat e tyre. Forcat e rendit ishin të shumta dhe ruanin çdo pikë kyçe të qytetit.
