TIRANË– Mediat italiane kanë raportuar se gjykata në Itali ka lënë në burg dy shqiptarët e Maqedonisë së Veriut, që akuzohen se vranë mbrëmjen e 25 Nëntorit në Marghera, shqiptarin Van Koxha me origjinë nga Dibra.
Dyshohet që konflikti mes tyre ka nisur për shkak të jojërave të fatit, megjithatë ende nuk është konfirmuar zyrtarisht.
Ndërkohë janë mësuar edhe emrat e të dyshuarve, që kanë mohuar krimin përballë gjykatës. Policia ka shpallur në kërkim dhe dy persona të tjerë, që dyshohet se kanë gisht në ngjarje. Dy shqiptarët e arrestuar janë Adnan Ramadani, 30 vjeç dhe Imer Imeri, 49 vjeç.
Ndaj Ramadanit rëndon akuza e “vrasjes me paramendim”, si dhe “armëmbajtja pa leje”. Imeri akuzohet për përfshirje në grindje. Ramadani ka shfrytëzuar të drejtën për të mos u përgjigjur në gjykatë. Bashkëpunëtori i dyshuar ka deklaruar se nuk ka marrë pjesë në sherr, por se thjesht ka qenë pranë vendit të ngjarjes. Pas krimit, dy të dyshuarit janë parë duke ikur me vrap, ndërsa dyshohet se kanë dashur të fshehin edhe një thikë.
Avokati mbrojtës i të pandehurve ka deklaruar se Imeri çalon, ndaj e ka pasur të pamundur të përfshihej në sherr. Përcaktuese mund të jetë autopsia, e cila do të kryhet nga mjeku kompetent, si dhe ekzaminimi i armës së sekuestruar nga Adnan Ramadani, një thikë kuzhine 13 cm, e cila nuk ka pasur gjurmë të gjakut.
Van Koxha dhe vëllai i tij janë sulmuar në mënyrë brutale me armë të ftohta, teksa 41-vjeçari mori plagë të thella në gjoks e në qafë, që ishin vdekjeprurëse për të, ndërsa vëllai i tij mbijetoi.
Kjo ngjarje mund të kishte pasur pasoja edhe më fatal sesa vetëm 1 viktimë, pasi nëse të plagosurit nuk do kërkonin ndihmën e një patrulle policie, duke iu drejtuar: Na ndihmoni, na therën. Një nga policët çoi të plagosurit në spital, ndërsa tjetri ndoqi të dyshuarit.
Krimi ka ndodhur në Marghera, në një zonë, që njihet si një “vend ku gëlon krimi”. Zona njihet edhe për lojëra ilegale kumari, ku luhen shuma të konsiderueshme. Si viktima, edhe autorët nuk jetonin në atë zonë./Radar.al