Një ngjarje e jashtëzakonshme ka tronditur sot Bulqizën: një 27-vjeçar është gjetur me shenja jete, plot dy ditë pas një aksidenti rrugor, brenda një automjeti të rrëzuar në zallin pranë urës së Çeranecit, në aksin Bulqizë–Peshkopi.
Burime nga vendngjarja bëjnë me dije se i riu u pikas rastësisht nga disa fëmijë që po laheshin në zonë, të cilët më pas njoftuan banorët e afërt. Këta të fundit lajmëruan menjëherë ambulancën.
I plagosuri është dërguar me urgjencë në spitalin e Bulqizës dhe ndodhet nën kujdesin e mjekëve. Dyshohet se aksidenti ka ndodhur dy ditë më parë, kur mjeti me të cilin udhëtonte ka dalë nga rruga dhe ka përfunduar në zall, në një zonë të paarritshme nga rruga kryesore.
Policia ka nisur hetimet për të zbuluar rrethanat e aksidentit, ndërsa mbijetesa e të riut konsiderohet një mrekulli, falë qëndrueshmërisë së tij dhe ndërhyrjes së shpejtë të komunitetit lokal.