Italia po përballet sërish me pasoja tragjike nga moti ekstrem.
Një burrë 40-vjeçar, i shpallur i zhdukur që prej së martës pasdite në Siçili, është gjetur i vdekur pasi mjeti i tij u mor nga ujërat e përroit Crisa, që doli nga shtrati për shkak të shirave të rrëmbyeshëm në zonën Leonforte, provinca e Ennës. Forcat e shpëtimit e gjetën trupin pas kërkimeve disaorëshe.
Ndërkohë, moti i keq po përshkallëzohet në veri të Italisë. Në Milano, reshjet intensive detyruan autoritetet të mbyllin hapësira publike dhe të mbajnë shërbimet e emergjencës në gatishmëri për shkak të rritjes së nivelit të lumit Lambro.
Tre rajone – Lombardia, Emilia Romagna dhe Liguria – ndodhen nën alarm portokalli, me thirrje për qytetarët që të shmangin udhëtimet e panevojshme dhe të marrin masa vetëmbrojtëse.
Në kontrast me situatën dramatike në veri, Italia qendrore po përjeton mot të butë dhe temperatura të larta, të mbetura nga vala e të nxehtit që parapriu stuhive.