Reshjet intensive të shiut në Durrës dhe qytete të tjera të vendit kanë vënë në provë gatishmërinë e Policisë së Shtetit, e cila ka qenë pranë qytetarëve, duke rregulluar trafikun mes ujit dhe duke asistuar mjete të ngecura në akset e përmbytura.
Gjatë gjithë ditës, efektivët e policisë kanë treguar përgjegjshmëri, angazhim, sakrificë dhe humanizëm në shërbim të qytetarëve. Nën drejtimin e Drejtorit të Përgjithshëm të Policisë, Ilir Proda, punonjësit kanë qëndruar në rrugë për të garantuar rendin publik dhe për të lehtësuar lëvizjen e mjeteve.
Proda shprehu mirënjohje për punonjësit e policisë dhe falënderoi qytetarët që kanë dërguar dhjetëra mesazhe dhe video falënderimi për punën e tyre në terren.
Sakrifica e efektivëve shpesh kalon pa u vënë re, por është thelbësore për sigurinë e të gjithëve. Respektimi i udhëzimeve dhe bashkëpunimi i qytetarëve mbetet mënyra më e mirë për të vlerësuar këtë angazhim.