Tre avionë luftarakë rusë MiG-31 u raportua se shkelën hapësirën ajrore të Estonisë për rreth 12 minuta, përpara se të zmbrapseshin nga avionët italianë F-35 të NATO-s. Ky është incidenti i tretë me avionë ose dronë rusë në hapësirën ajrore të NATO-s brenda një kohe të shkurtër, pas rasteve të ngjashme në Poloni dhe Rumani.
Ministria ruse e Mbrojtjes reagoi disa orë më vonë, duke mohuar akuzat. Sipas saj, tre MiG-31 kryen një fluturim të planifikuar nga Karelia drejt rajonit të Kaliningradit dhe nuk kanë hyrë në hapësirën ajrore të Estonisë, duke theksuar se lëvizja u krye “në përputhje me rregullat ndërkombëtare”.
Në të njëjtën kohë, Komisioni Evropian miratoi paketën e 19-të të sanksioneve kundër Rusisë. Presidentja Ursula von der Leyen njoftoi se masat përfshijnë ngrirjen e aseteve të gjigantëve energjetikë Gazprom dhe Rosneft, si dhe kufizime të reja mbi përdorimin e kriptovalutave – për herë të parë të përfshira në një paketë sanksionesh.
Pavarësisht presionit, tetë vende të BE-së – Belgjika, Holanda, Franca, Spanja, Portugalia, Greqia, Sllovakia dhe Hungaria – vijojnë ende të importojnë gaz natyror rus.
Ndërkohë, SHBA miratoi një marrëveshje për shitjen e raketave dhe sistemeve antitank Javelin, me vlerë 780 milionë dollarë, për Poloninë – një nga vendet ku së fundmi janë regjistruar inkursione të dronëve rusë.