Një 22-vjeçar shqiptar u arrestua nga policia italiane në Piacenza, nën akuzën e trafikut të kokainës, pas një operacioni të zhvilluar me disa ditë vëzhgim dhe ndjekje.
Sipas autoriteteve, i riu po furnizonte një rrjet të madh përdoruesish, duke udhëtuar me një Fiat Punto me qira për të shpërndarë drogën direkt te klientët dhe për të shmangur hetuesit.
Operacioni u ndërmor dje në orët e para të pasdites, menjëherë pas një pazari droge, gjatë të cilit policia sekuestroi shtatë doza kokaine dhe 210 euro në posedim të tij.
Hetimet zbuluan se shqiptari ndodhej në Itali pa qëndrim të rregullt dhe nuk kishte precedentë penalë të mëparshëm. Në procedim u përfshi edhe një shtetas italian, i cili kishte blerë kokainën.