Pasi burri me të cilin po ndahej e leu me benzinë, i vuri flakën dhe u arratis, Melisa Trëndafili, nënë e dy fëmijëve, ka kërkuar ndihmë nga fqinjët e saj. Ngjarja ndodhi sot në Korçë, pranë banesës ku jetonte me qira 31 vjeçarja, pasi kishte ikur nga çatia martesore.
Fqinji i saj ka treguar momentet e tmerrit që ka parë me sy.
Dëshmia e qytetarit:
“Kam parë një burrë i cili në mes të rrugës fare pranë shtëpisë sime ka spërkatur me benzinë një grua e me pas i ka vënë flakën.
Gruaja e tmerruar ka trokitur në portën e shtëpisë time dhe së bashku me bashkëshorten e kemi ndihmuar fikjen e flakëve të zjarrit.
I kemi hequr të gjitha rrobat nga trupi dhe e kemi veshur, por plagët me përjashtim të fytyrës dhe këmbëve, ishin të mëdha dhe pothuajse gjithë trupi ishte me plagë të shumta.
Kemi lajmëruar policinë dhe ambulancen të cilët erdhën shpejt në vendin e ngjarjes.”