Një incident i rrezikshëm ka ndodhur të premten në aeroportin e Los Angeles, ku një avion i linjës “Delta Airlines” u detyrua të bëjë ulje emergjente, pasi motori i majtë i tij u përfshi nga flakët menjëherë pas ngritjes.
Pamjet filmike, të publikuara në rrjetet sociale, tregojnë qartë momentin kur mjeti fluturues tip Boeing 767-400 ngrihet në ajër ndërsa nga motori i majtë shpërthejnë flakë të mëdha. Fluturimi DL446, i cili ishte nisur drejt Atlantës, u kthye menjëherë në pistë për arsye sigurie.
Avioni u prit në tokë nga shërbimet e emergjencës, të cilat ndërhynë për të vlerësuar situatën dhe për të garantuar sigurinë e pasagjerëve dhe ekuipazhit.
Fatmirësisht, nuk raportohet për të lënduar, ndërsa Delta Airlines nuk ka dhënë ende një deklaratë zyrtare mbi shkakun e defektit teknik.
Ngjarja ka nxitur diskutime të reja mbi sigurinë teknike të avionëve komercialë, veçanërisht në linjat e ngarkuara si ato të brendshme amerikane.