Strukturat e Ministrisë së Bujqësisë dhe Zhvillimit Rural, në bashkëpunim me bashkinë e Devollit dhe Forcat e Armatosura, po punojnë intensivisht për mbylljen e çarjes së argjinaturës së lumit Devoll, e shkaktuar nga prurjet e shumta të ditëve të fundit.
Për të mundësuar mbërritjen e mjeteve dhe materialeve inerte, po ndërtohet një rrugë e përkohshme me gjatësi 3,2 kilometra.
Ministri i Bujqësisë, Andis Salla, së bashku me prefektin Nertil Jole, kryetarin e bashkisë Gëzim Topçiu, zëvendësministrin Arian Jaupllari dhe drejtorin e UK Korçë, Gentian Aliçkolli, inspektuan zonën e Sheqerasit, ku ekipet po punojnë për rehabilitimin e argjinaturës.
Salla bëri të ditur se ngritja e pritës provizore ka ndalur depërtimin e ujit në Fushën e Maliqit dhe ka mundësuar që gjatë këtyre ditëve pa reshje, uji të tërhiqet nëpërmjet rrjetit kullues, ndërsa vijon puna për mbylljen përfundimtare të çarjes.
“Prioritet absolut mbetet mbyllja e çarjes për të shmangur çdo përmbytje të mundshme. Ekipet janë në gatishmëri të plotë dhe punojnë 24 orë në 24 me intensitet maksimal. Çdo orë që fitojmë është e rëndësishme për sigurinë e zonës para reshjeve të radhës”, deklaroi ministri Salla.
Në zonën e prekur janë shtuar mjetet e rënda dhe kapacitetet logjistike, ndërsa po vendosen masivisht gurë dhe materiale mbushëse për stabilizimin e argjinaturës.