Ministri i Brendshëm Taulant Balla sot gjatë inspektimit në Divjakë, deklaroi se kjo zonë mbetet një destinacion i rëndësishëm turistik, ndaj duhet garantuar një mbarëvajtje e sezonit turisitik.
“Edhe ky bashkim mes gjithë aktorëve që përfshihen në këtë proces, PSH, Shërbimi Zjarrfikës, Policia Bashkiake, në fakt e tërë bashkia, është në funksion të mbarëvajtjes së këtij sezoni turistik. Edhe pjesa që lidhet me Policinë Kufitare, ka një rëndësi të veçantë për të garantuar perimetrin e sigurisë për të gjithë pushuesit. Mjetet motorike kanë vendin e tyre duhet të respektojnë largësinë. Edhe Njësia e Bregdetit ka peshën e vet, për të garantuar sigurinë e jetës së çdo pushuesi”, tha ministri.
Përveç garantimit të sigurisë në det, Balla kërkoi të përkushtohet vëmendje nga strukturat për mbajtjen nën fokus të paligjshmërive të tjera.
Balla nënvizoi se autoritetet nuk duhet të tolerojnë asnjë rast pa ndëshkuar qoftë për shkeljet e rregulloreve nga mjetet rrugore si dhe për mjetet detare.
Balla shprehu marakun e tij për pjesën e ‘Jet Ski-ve’, të cilat janë një problem që duhet monitoruar për të garantuar që ato të kenë vendin e vet, edhe pushuesit të vetin.
“Natyrshëm sa i përket Komisariatit të Policisë, duhet të rrisim prezencën në territor përkundrejt veprimtarive kriminale që lidhen kryesisht me vjedhjet. Kemi pasur raste në Divjakë për të cilat kryetari i bashkisë, bashkë me mua dhe kolegët, shprehim shqetësim dhe që kërkohet të kemi sa më shumë prezencë, kontroll e mbi të gjitha, parandalim të këtyre ngjarjeve” thekson ministri Balla .