Në mbledhjen e Komitetit Ekzekutiv të UEFA-s gjatë ditës së djeshme në Pragë, u morën një sërë vendimesh, përfshi këtu edhe dakordësia për shpërndarjen e fondit të solidaritetit për klubet që nuk marrin pjesë në garat Europiane.
Vitin e kaluar u miratua një rritje e konsiderueshme e këtij fondi për klubet, ndërsa dje u miratuan kriteret për shpërndarjen e shumave të reja për ciklin tri vjeçar 2024-2027. Nëse më parë për fondin e solidaritetit shkonin 4% nga 4.4 miliardë euro të ardhura të parashikuara, që llogaritet 176 milionë euro, kjo shifër është rritur në 7 % dhe klubet që nuk marrin pjesë në kompeticionet europiane do të përfitojnë 308 milionë euro në total.
MILIONAT- Në bashkëpunim me federatat anëtare, u vendos një kufi për shpërndarjen në pesë federatat më të mira (Angli, Spanjë, Itali, Gjermani, Francë) ku është konfirmuar se do të marrin nga 10 milionë euro secila. Kështu, fondet në dispozicion për 50 federatat e mbetura do të jenë 258 milionë euro nga 135 milionë që përfitonin më përpara. 70 % e këtyre shumave do të shpërndahen bazuar në pozicionin e tyre në listën e UEFA-s dhe këtu Shqipëria penalizohet disi duke qenë se kampionati kombëtar renditet në vendin e 45-ë në renditjen e UEFA-s. Ndërsa 30% do të jetë proporcionale me shumat e marra nga klubi më fitues i çdo federate.
PËRFITUESIT- Në javët në vijim do të publikohet edhe skema e re e shpërndarjes së fondit të solidaritetit për tri sezonet pasardhëse. Fondet do të përmirësojnë ose forcojnë strukturat e klubeve dhe standardet e qeverisjes, duke rritur kështu zhvillimin e shëndetshëm të futbollit evropian të klubeve. Një pjesë e fondeve mund të kalojë në klubet e kategorisë së dytë, me marrëveshjen e klubeve të elitës. Për të qenë të pranueshëm, ata duhet të përmbushin disa kritere të UEFA-s për licencimin e klubeve, me kriteret e trajnimit të të rinjve që janë ende një element përcaktues./PanoramaSPORT