TIRANË-Kreu i Partisë së Lirisë Ilir Meta ka folur në një emision televiziv ndërsa është i arrestuar. Teksa ndodhet në qelinë numër 5 prej 3 muajsh, Presidenti i Partisë së Lirisë, Ilir Meta, ka folur për emisionin “Debat” në A2CNN.
Pavarësisht se ka afro 100 ditë në qeli, Meta shprehet se ndjehet më i lirë se më parë dhe se e drejta për të do të triumfojë. Burgosjen e tij Meta e quan “syrgjynosje” për t’iu pamundësuar mbrojtja në publik. Ai shprehet se nuk ka asnjë akuzë, pavarësisht se SPAK ka vijuar hetimet edhe gjatë kohës që ai ka qenë në paraburgim.
“Nuk ka asnjë provë apo fakt penal që ka të bëjë me Ilir Metën gjatë 32 viteve të shërbimit publik. Nuk ekziston asnjë shkresë apo akt zyrtar nga Ilir Meta që ka dëmtuar një qindarkë buxhetin e shtetit apo që ka shkelur ligjin. Ndërkohë që janë të shumta shkeljet e ligjit dhe favorizimet e paligjshme që uzurpatori i gjithë pushteteve ka kryer me firmën e tij, të cilat SPAK ka tmerr t’i shikojë e jo më t’i hetojë.”-thotë ai.
Ndër të tjera ka pohuar se nuk pret asnjë masë lehtësuese para zgjedhjeve 11 majit, por shton se kjo nuk e dekurajon për të vijuar betejën dhe konfirmon koalicionin me Partinë Demokratike.
“Partia e Lirisë do të jetë një opozitë e vërtetë gjithmonë dhe për këtë qëllim do të bashkëpunojë me PD në interes të mbrojtjes të pluralizmit politik, interesit Kombëtar e publik dhe rivendosjes së llogaridhënies.”– shprehet Presidenti Partisë së Lirisë.
Pavarësisht se ndodhet në burg Meta, thotë se do të drejtojë vetë fushatën elektorale për zgjedhjet e 11 majit. Teksa pranon se do jetë kandidat për deputet, tregon dhe objektivin e opozitës.
“Në çdo rast unë do të jem deputet i atyre që më kanë besuar e votuar që nga viti 2005 e në vazhdimësi. Por objektivi im kryesor është përmbysja e narkoregjimit. Partinë e Lirisë dhe fushatën e saj e drejtoj unë si President i zgjedhur i saj në Prillin e kaluar në bashkëpunim me të gjithë kolegët dhe forumet e saj.”-deklaron Meta.
Presidenti i Partisë së Lirisë u bën thirrje qytetarëve që të mbështesin opozitën, pasi siç thotë ai 11 maji është datë./Radar.al