Niveli i lumit Vjosa ka arritur në kuotën kritike prej 8.6 metrash, duke detyruar evakuimin e 13 familjeve nga zonat e rrezikuara në qarkun e Vlorës. Autoritetet lokale dhe policia ndodhen në terren për monitorimin e vazhdueshëm të situatës.
Kryetarja e Bashkisë Vlorë, Brunilda Mersini, së bashku me drejtorin e Policisë së qarkut, Elidon Çela, po ndjekin nga afër zhvillimet në zonat e prekura. Në një prononcim për mediat, Mersini tha se situata paraqitet aktualisht kritike për shkak të prurjeve të larta të lumit.
“Prurjet janë në nivelin 8.6 metra. Në orët në vijim presim një ulje graduale të sasisë së ujit, pasi zona jugore nga ku vijnë prurjet është stabilizuar dhe kjo pritet të reflektohet brenda 12 orëve,” u shpreh kryebashkiakja.
Ajo bëri të ditur se gjashtë familje të tjera ndodhen në zonë me risk të lartë dhe do të evakuohen nëse niveli i ujit tejkalon këtë kuotë. “Deri tani, 13 familje janë larguar ose janë vënë në gatishmëri për t’u larguar nga zonat e rrezikuara,” shtoi Mersini.
Nga ana e tij, drejtori i Policisë së qarkut Vlorë, Elidon Çela, deklaroi se të gjitha strukturat janë në gatishmëri të plotë për çdo ndërhyrje të nevojshme.
“Kemi në dispozicion mjete me kalueshmëri të lartë dhe, në rast nevoje për evakuime të tjera, policia dhe emergjencat civile do të ndërhyjnë menjëherë kudo që të kërkohet,” theksoi Çela.
Autoritetet u bëjnë thirrje banorëve të ndjekin udhëzimet zyrtare dhe të shmangin lëvizjet e panevojshme në zonat e rrezikuara.