Deputetja e PD dhe kandidate në listat e hapura në qarkun e Tiranës për 11 majin, Jorida Tabaku, ishte e ftuar në emisionin “Kjo javë” me Nisida Tufën në News24.
Ajo ka folur në lidhje me nisjen e fushatës, dhe jetës së ndarë mes politikës dhe familjen, “punë” kjo shpesh e vështirë duke pasur parasysh intensitetin e kësaj periudhe, kur na ndajnë vetëm pak më shumë se një muaj nga data e zgjedhjeve të 11 majit.
Një nga çështjet që krijoi habi ishte fakti që pavarësisht se doli si më e votuara në Primare, Tabaku u vendos në listat e hapura të PD për 11 majin.
Sipas saj, një vendim i tillë i ishte bërë më parë i njohur nga kreu i PD Sali Berisha në një bisedë të gjatë paraprake, përpara se çështja të shkonte në kryesi.
“Nëse atë që bën e bën me shpirt, besoj se gjithmonë ka një rrugë një zgjidhje. Ka qëlluar këto kohë që edhe në periudhën e vështirë të PD mendon a është ky vendi ku dua të punoj? Por pastaj ndodh një shkëndijë që të jep besim.
Me daljen e listave mund të kisha një ndjenjë rezerve në vete, por kam pasur një mbështetje nga qytetarët që më dhanë një forcë që më bëri të kuptoj që në beteja dalin njerëzit më të fortë dhe në beteja është ringritja më e fortë.
Unë me Berishën kam bërë një bisedë të gjatë dhe dalja e listave nuk ishte surprizë. Unë i marr gjërat seriozisht. Kishim një garë Primaresh ku u vlerësova si zonja më e votuar, dhe mendova ky ishte procesi dhe duhej marrë parasysh. E rëndësishme është mbështetja e demokratëve dhe qytetarëve. Ka disa momente që duhen kaluar.
Në 2021 isha e dyta në listën e Tiranës, por kjo nuk më ka ndaluar që të punoj për PD 24 orë 100 përqind e ta shfrytëzoj këtë për t’u rritur”, tha Tabaku.