Kryepeshkopi i Shqipërisë, Anastas Janullatos u transportua më 3 janar në Athinë nga Tirana me një avion të Forcave Ajrore dhe po trajtohet në spitalin Evangelismos.
Media greke “Protodhema” shkruan se ai u transportua nën mbikëqyrjen e një mjeku dhe dy infermierëve, personel i trajnuar për transportin ajror.
Avioni C-27J që transportoi Kryepeshkopin ortodoks nga Tirana, u ul në orën 19:34 në bazën ajrore të Elefsinës.
Janullatos aktualisht po i nënshtrohet disa analizave laboratorike. Sipas të njëjtave informacioneve, kryepeshkopi nuk është i intubuar dhe po komunikon me të pranishmit.
Anastas Janullatos u shtrua më 30 dhjetor në një spital të Tiranës. Në atë kohë ai u konstatua se ishte prekur nga një virus sezonal dhe shtrimi i tij në spital u gjykua i nevojshëm kryesisht për arsye parandaluese, nisur nga mosha (95 vjeç) dhe shëndeti i rënduar.
Për këtë shkak u gjykua e domosdoshme që ai të transferohej në Athinë dhe në veçanti në spitalin Evangelismos, ku do të trajtohet në një repart të thjeshtë dhe jo në Repartin e Terapisë Intensiv, siç thuhej fillimisht.
Ndërkaq, Valbona Duri, nga zyra e Marrëdhënieve me publikun në Kishën Orthodhokse Autoqefale të Shqipërisë njoftoi se: “Gjendja e Kryepiskopit Anastas eshtë e stabilizuar, por për diagnostikim më të specializuar të sugjeruara nga mjekët, u dërgua në Athinë”, sqaroi shkurtimisht Valbona Duri.
Kryepeshkopi Anastas u shtrua në të njëjtin spital, në nëntor 2020, kur u infektua me koronavirus.