Përdorimi i makinës nga vajzat dhe gratë shqiptare po njeh rritje të fortë vitet e fundit. Sipas statistikave të Drejtorisë së Përgjithshme të Transportit Rrugor, raporti gjinor në timon po afrohet në 30% gra dhe 70% burra, duke treguar një ndryshim të qartë krahasuar me disa vite më parë.
Në vitin 2020, vetëm 23% e drejtuesve të regjistruar ishin gra, ndërsa në 2024 kjo shifër ka arritur në 29%. Rritja më e madhe është shënuar tek grupmosha 25–34 vjeç, ku aktualisht janë aktive rreth 129 mijë leje drejtimi për gra dhe vajza.
Tirana kryeson me mbi 214 mijë drejtues meshkuj dhe 150 mijë femra, e ndjekur nga Durrësi dhe Elbasani. Në qytetet më të vogla, dallimet gjinore në drejtimin e makinës janë ende më të theksuara, për shkak të numrit më të ulët të popullsisë dhe traditave sociale.
Ky trend i ri tregon për një rritje të pavarësisë dhe mobilitetit të grave, sidomos në moshat e reja, duke reflektuar ndryshime të dukshme shoqërore në vend.