Autoritetet austriake kanë publikuar identitetin dhe fotot e 21-vjeçarit Arthur A., i cili kreu një masakër të përgjakshme në një shkollë në Graz, duke vrarë nëntë nxënës dhe një mësues përpara se të vetëvritej.
Ngjarja tronditëse ndodhi në ambientet e shkollës, ku i riu përdori një pistoletë dhe një pushkë për të qëlluar në mënyrë të pamëshirshme në dy klasa dhe hapësira të tjera të godinës. Viktimat ishin gjashtë vajza dhe tre djem, të moshës 14 deri në 17 vjeç, si dhe një mësues 59-vjeçar. Gjithashtu, 11 persona të tjerë u plagosën, katër prej të cilëve ndodhen në kujdes intensiv.
Mediat lokale raportojnë se Arthur kishte lënë një letër dhe kishte regjistruar një video lamtumire në telefonin e tij, të cilën ia dërgoi nënës së tij pak para sulmit. Në të, ai shprehej:
“Më fal për atë që do të bëj tani. Faleminderit për gjithçka, për dashurinë dhe kujdesin tënd. Ti nuk ke faj për asgjë.”
Sipas autoriteteve, nëna e tij e pa videon vetëm 24 minuta pasi sulmi kishte ndodhur dhe djali i saj i kishte dhënë fund jetës. Në letrën që la pas, Arthur akuzonte shkollën për ngacmim dhe vështirësitë që kishte kaluar, si dhe kërkonte që të kujdeseshin për macen e tij, me të cilën ai kishte pozuar në një nga fotot.
I riu jetonte me nënën në Kalsdorf, pranë Grazit, dhe kishte pasur vështirësi të mëdha në shkollë, duke ngelur disa herë. Ai posedonte leje për mbajtjen e armëve të gjahut, por jo për armë zjarri, çka ka shtuar shqetësimet rreth kontrollit të armëve në Austri.
Gjithashtu, në shtëpinë e tij u gjet edhe një pajisje shpërthyese që rezultoi jo funksionale.
Ky akt i rëndë, që po trajtohet si një hakmarrje e motivuar nga dështimi personal dhe izolimi social, ka tronditur opinionin publik në Austri dhe më gjerë. Hetimet vijojnë, ndërsa shkollat dhe institucionet e tjera në vend kanë rritur masat e sigurisë.