Një nga skandalet më të mëdha korruptive në Greqi kërcënon të mbyllet para kohe, ndërsa Kryeministri Kyriakos Mitsotakis vendos të bllokojë hetimin ndaj ish-ministrave dhe zyrtarëve të lartë të dyshuar për abuzim me qindra milionë euro fonde të Bashkimit Evropian.
Hetimi i Zyrës së Prokurorit Publik Evropian (EPPO) ka zbuluar një rrjet të sofistikuar mashtrimi që përfshin deklarime të rreme për kullota dhe aktivitete bujqësore inekzistente, përmes të cilave janë përvetësuar në mënyrë të paligjshme subvencione të BE-së.
Dosja e EPPO-së, që përmban mbi 3 mijë faqe dhe dëshmi përgjuese, përfshin emrat e të paktën pesë ish-ministrave dhe dhjetë deputetëve nga partia në pushtet, Demokracia e Re.
“Greqia në vitin 2025 nuk ka nevojë për skandale, por për të vërtetën,” deklaroi Mitsotakis, duke sinjalizuar refuzimin e tij për të lejuar vazhdimin e hetimit penal.
Sipas raportimit të “Politico”, mashtrimi u orkestrua nga brenda Ministrisë së Bujqësisë dhe agjencisë shtetërore OPEKEPE, e cila është përgjegjëse për shpërndarjen e fondeve evropiane. Zyrtarët akuzohen se kanë lejuar pagesa për pronarë të rremë kullotash, duke shmangur sistematikisht kontrollet zyrtare.
Brukseli i ka kërkuar tashmë Greqisë të kthejë rreth 400 milionë euro, mbi 20% e fondeve bujqësore të vitit të ardhshëm – një dëm i jashtëzakonshëm për taksapaguesit evropianë.
Ndër të hetuarit janë edhe ish-ministrat Lefteris Avgenakis dhe Makis Voridis. Ky i fundit dyshohet se ka detyruar ish-drejtuesin e OPEKEPE të japë dorëheqjen pas raportimit të parregullsive, ndërsa Avgenakis akuzohet se shkarkoi një tjetër drejtues për të bllokuar hetimet mbi mbi 9,000 pagesa të dyshimta.