Përzgjedhësi i Portugalisë, Roberto Martinez, ka folur në prag të përballjes ndaj Kroacisë në fazën e 1/16 së finales të Kupës së Botës 2026, duke vlerësuar kundërshtarin dhe duke theksuar rëndësinë që Cristiano Ronaldo vazhdon të ketë brenda skuadrës.
Tekniku portugez u shpreh se ndeshjet e fazës së grupeve kanë shërbyer si përgatitja ideale për sfidat me eliminim direkt, ndërsa pranoi se ekipi i tij ka ende elemente për të përmirësuar.
“Nesër nis Botërori ynë i vërtetë. Përgatitja gjatë tri ndeshjeve të fazës së grupeve ishte shumë e rëndësishme. Kemi bërë shumë gjëra mirë, por ka edhe aspekte që duhet t’i përmirësojmë”, deklaroi Martinez.
Duke analizuar Kroacinë, ai theksoi se bëhet fjalë për një ekip me stil loje të ngjashëm me Portugalinë, ku posedimi i topit pritet të luajë rol vendimtar.
“Kroacia është një skuadër që, ashtu si ne, dëshiron ta kontrollojë lojën përmes posedimit të topit. Të dyja ekipet janë më të rrezikshme kur e kanë topin dhe kjo do të jetë një nga çelësat e ndeshjes”, u shpreh ai.
Martinez shtoi se mes dy kombëtareve nuk ka shumë sekrete, pasi janë përballur edhe në Ligën e Kombeve, ndërsa nuk kurseu fjalët e mira për kundërshtarin.
“Dua të vlerësoj punën e trajnerit të Kroacisë, i cili ka drejtuar ekipin për një dekadë. Ata kanë futbollistë të jashtëzakonshëm si Modric, Gvardiol dhe Kovacic”, tha ai.
I pyetur nëse Cristiano Ronaldo do ta nisë ndeshjen si titullar, Martinez nuk dha një përgjigje konkrete, por e bëri të qartë se kapiteni mbetet një figurë kyçe për Portugalinë.
“Cristiano Ronaldo është shumë i rëndësishëm për ne. Ai është kapiteni ynë. Mosha është vetëm një numër. Me profesionalizmin dhe sjelljen e tij në dhomat e zhveshjes, ai është shembull për të gjithë, madje edhe për mua”, përfundoi përzgjedhësi portugez.