Një ngjarje e rëndë është regjistruar pasditen e sotme në aksin kombëtar Levan-Tepelenë, në vendin e quajtur “Kthesa e Fratarit”, ku një automjet është përfshirë papritur nga flakët. Brenda mjetit ndodhej një familje – një çift bashkëshortësh me dy fëmijët e tyre të vegjël.
Sipas burimeve, drejtuesi i automjetit ka dëgjuar një zhurmë të fortë në pjesën e poshtme të makinës dhe ka ndaluar menjëherë në anë të rrugës. Ai ka arritur të nxjerrë me shpejtësi bashkëshorten dhe fëmijët jashtë mjetit, vetëm pak çaste përpara se makina të përfshihej plotësisht nga flakët.
Zjarrfikësit kanë ndërhyrë në kohë dhe kanë shuar zjarrin, por mjeti është djegur tërësisht. Ngjarja shkaktoi bllokim të përkohshëm të trafikut dhe panik te përdoruesit e tjerë të rrugës.
Dyshohet se zjarri ka qenë pasojë e një defekti teknik, por hetimet vijojnë për të sqaruar rrethanat. Fatmirësisht, falë reagimit të shpejtë dhe gjakftohtësisë së shoferit, është shmangur një tragjedi dhe askush nga familjarët nuk ka pësuar lëndime.