Një incident i rrezikshëm ka ndodhur këtë pasdite në aksin rrugor Belsh–Kuçovë, pranë zonës së njohur si “Lokalitet”, ku një automjet tip Benz ka marrë flakë gjatë lëvizjes.
Në mjet ndodheshin pesë persona, të gjithë anëtarë të së njëjtës familje, të cilët fatmirësisht kanë arritur të dalin në kohë, pa pësuar lëndime.
Zjarri, i cili mori përmasa të mëdha, përveç rrezikut për jetën e udhëtarëve, shkaktoi edhe panik te banorët e disa shtëpive pranë rrugës. Për shkak të erës, flakët u përhapën drejt zonës përreth, duke u afruar rrezikshëm pranë banesave.
Forcat zjarrfikëse ndërhynë për të neutralizuar zjarrin dhe për të shmangur përhapjen e tij më tej. Rrethanat e plota të ngjarjes janë ende në hetim.