Qyteti Terrassa në Katalonjë ka ndërmarrë një masë të pazakontë këtë sezon Halloween-i: ka ndaluar përkohësisht adoptimin e maceve të zeza, për të parandaluar përdorimin e tyre në rituale të dyshimta apo si rekuizita në festa.
Sipas raportimit të BBC, ndalimi do të jetë në fuqi nga 6 tetori deri më 10 nëntor, dhe gjatë kësaj periudhe çdo kërkesë për birësim ose kujdes të maceve të zeza do të refuzohet. Vendimi është marrë nga shërbimi lokal i mirëqenies së kafshëve për të mbrojtur këto kafshë simbolike nga dëmtimet e mundshme.
Zëvendëskryetari i bashkisë, Noel Duque, deklaroi për “RTVE” se kërkesat për adoptimin e maceve të zeza rriten ndjeshëm në periudhën e Halloween-it, dhe shumë prej tyre janë “adoptime impulsive”, të nxitura nga moda apo supersticionet.
Në kulturën perëndimore, macet e zeza shpesh lidhen me magjinë dhe fatin e keq, ndërsa në vende si Japonia apo Egjipti ato konsiderohen shenja fati dhe begatie.
Edhe pse në Terrassa nuk janë raportuar raste konkrete dhune ndaj maceve të zeza, bashkia ka vendosur të veprojë parandalisht, pas këshillave të organizatave për mbrojtjen e kafshëve.
“Përpiqemi të shmangim adoptimet impulsive, vetëm sepse diçka është në modë. Dhe duam të parandalojmë praktika makabre që dimë se ekzistojnë,” – theksoi Duque.
Sipas autoriteteve, në qytet jetojnë mbi 9 800 mace, ndërsa në qendrën e adoptimit ndodhen rreth 100, prej të cilave 12 janë të zeza.
Këshilli bashkiak ka sqaruar se masa është e përkohshme dhe e jashtëzakonshme, por nuk përjashtohet mundësia që ajo të përsëritet vitet e ardhshme, nëse fenomeni vijon të shfaqet. Rastet e veçanta do të shqyrtohen individualisht, ndërsa procedurat normale të adoptimit pritet të rifillojnë pas përfundimit të Halloween-it.