Një operacion masiv i forcave të sigurisë në Rio de Zhaneiro ka përfunduar me bilanc tragjik, ku të paktën 20 persona, përfshirë dy oficerë policie, kanë humbur jetën. Ngjarja ndodhi vetëm pak ditë para se qyteti brazilian të mirëpresë samitin global të klimës “COP30”, raporton Reuters.
Guvernatori i shtetit, Claudio Castro, e cilësoi ndërhyrjen si një “përballje me narkoterrorizmin”, duke theksuar përmes rrjeteve sociale se në operacion morën pjesë rreth 2 500 efektivë të sigurisë. Forcat e policisë u angazhuan në zonat e favelave Alemao dhe Penha, lagje të varfra dhe të mbipopulluara në periferi të qytetit, të njohura për praninë e grupeve kriminale.
Sipas autoriteteve, 18 nga viktimat dyshohet se ishin të lidhura me rrjete të trafikut të drogës. Operacioni kishte në shënjestër bandën famëkeqe “Comando Vermelho”, një nga grupet kriminale më të fuqishme në Brazil.
Gjatë aksionit u arrestuan 56 persona, ndërsa policia po ekzekuton rreth 250 urdhra arresti dhe kontrolli. Qeveria e përshkroi këtë ndërhyrje si më të madhin e kryer ndonjëherë kundër këtij grupi.
Ngjarja ndodh në prag të zhvillimit të samiteve ndërkombëtare në Rio, përfshirë “C40” të kryebashkiakëve globalë dhe ceremoninë e ndarjes së Çmimit “Earthshot” të Princit William, ku do të marrin pjesë figura të njohura si Kylie Minogue dhe Sebastian Vettel.
Të dyja eventet konsiderohen si pjesë e përgatitjeve për Samitin e Kombeve të Bashkuara për Klimën “COP30”, që do të mbahet në qytetin Belem, në veriun e Brazilit.
Operacionet e tilla policore zakonisht shtohen përpara ngjarjeve të mëdha ndërkombëtare, siç ndodhi edhe para Kupës së Botës 2014, Lojërave Olimpike 2016, samitit të G20 në 2024, dhe takimit të “BRICS” më herët këtë vit.