Fshati piktoresk i Linit, buzë liqenit të Ohrit, po shndërrohet në një nga destinacionet më të vizituara të Shqipërisë, sidomos pas zbulimit arkeologjik të vendbanimit palafit rreth 8000-vjeçar, më i hershmi i zbuluar ndonjëherë në Evropë.
Kryebashkiaku i Pogradecit, Ilir Xhakolli, tha se ky zbulim ka rritur ndjeshëm interesin e turistëve të huaj, ndërsa vetëm Bazilikën e Linit gjatë këtij sezoni e kanë vizituar mbi 4700 vizitorë, prej të cilëve 3298 janë të huaj.
Përveç trashëgimisë arkeologjike, vizitorët mahniten nga peizazhet e liqenit, bujtinat tradicionale dhe gastronomia e zonës. Në bujtinën “Shtëpia e Luleve”, Rozeta Bicja rrëfen se turistët nga e gjithë bota shijojnë jo vetëm mikpritjen dhe arkitekturën e gurit, por edhe gatime tradicionale si lakrori dhe tava e koranit.
Në Lin po zhvillohen projekte të rëndësishme për infrastrukturën, kanalizimet dhe hapjen e një muzeu të dedikuar palafiteve. Fshati bën pjesë edhe në programin qeveritar të “100 fshatrave turistikë”.
Legjendat e lidhin emrin e Linit me “Lyhnidasin”, Liqenin e Dritës, që sipas gojëdhënave u përmend për herë të parë nga ushtarët e Jul Çezarit.