Policia e Tiranës ka finalizuar me sukses një tjetër operacion kundër armëmbajtjes pa leje, në kuadër të punës së vazhdueshme për rritjen e sigurisë publike. Operacioni i koduar “Kryqëzimi” çoi në arrestimin e një 21-vjeçari, i cili u kap në flagrancë me armë dhe mjete të tjera të kundërligjshme.
Sipas njoftimit zyrtar, u vu në pranga shtetasi G. Q., 21 vjeç, banues në Babrru, i cili u ndalua nga shërbimet e Komisariatit të Policisë Nr. 5 te kryqëzimi i Valiasit, ndërsa lëvizte me një automjet tip “Audi”.
Gjatë kontrollit të ushtruar në automjet dhe më pas në banesën e të riut, Policia gjeti dhe sekuestroi:
1 armë zjarri pushkë me municion,
1 armë të ftohtë (thikë),
1 palë pranga si ato të Policisë,
1 kapuç për maskim.
Të gjitha sendet e gjetura u sekuestruan si provë materiale, ndërsa ndaj 21-vjeçarit rëndojnë akuzat për armëmbajtje pa leje dhe mbajtje të pajisjeve që përdoren për kryerjen e veprave penale.
Materialet procedurale i janë referuar Prokurorisë së Tiranës, për veprime të mëtejshme ligjore.
Policia e Tiranës thekson se kontrollet dhe operacionet e tilla do të vijojnë pa ndërprerje, me fokus evidentimin dhe ndalimin e personave që mbajnë armë pa leje dhe që përbëjnë rrezik për rendin dhe sigurinë publike.
Radar.al