Shqipëria ka kaluar në avantazh ndaj Letonisë në ndeshjen e katërt kualifikuese për Botërorin 2026, e cila po zhvillohet në Riga. Kuqezinjtë kanë shënuar në minutën e 28-të falë një krosimi të Arbër Hoxhës që devijohet në rrjetë nga mbrojtësi leton Cernomordijs, duke rezultuar në një autogol.
Skuadra e Sylvinhos vjen në këtë sfidë pas barazimit 0-0 me Serbinë dhe kërkon fitoren për të ruajtur vendin e dytë në grup. Në formacionin titullar kanë ndodhur disa ndryshime, sidomos në mbrojtje, ku Ismajli dhe Kumbulla kanë zëvendësuar Gjimshitin dhe Ajetin, ndërsa Balliu ka marrë vendin e Hysajt. Rey Manaj, ndonëse humbi një penallti në ndeshjen e kaluar, ka marrë shiritin e kapitenit.
Ndeshja ka nisur me intensitet të lartë. Letonia humbi një mundësi të artë për të kaluar në avantazh në minutën e 21-të, kur Strakosha priti një penallti të ekzekutuar nga Ikaunieks.
Pjesa e parë ka qenë dinamike dhe me aksione të rrezikshme nga të dyja palët, por deri tani kuqezinjtë udhëheqin 1-0 falë gabimit të mbrojtësit leton.