Skiatorja italo-shqiptare Lara Colturi ka vijuar formën e saj të jashtëzakonshme në Kupën e Botës, duke siguruar një tjetër podium për Shqipërinë. Në garën e Slalomit të zhvilluar në Gurgl, Austri, 18-vjeçarja u rendit në vendin e dytë, duke konfirmuar performancën e lartë që ka shfaqur prej fillimit të sezonit.
Colturi e mbylli garën me kohën 1:49.34, vetëm 1.23 sekonda pas amerikanses Mikaela Shiffrin, e cila mori vendin e parë. Podiumin e plotësoi zvicerania Camille Rast, që u rendit e treta.
Në zbritjen e parë, Lara regjistroi kohën 54.53 sekonda, duke u pozicionuar menjëherë e dyta. Edhe pse në manovrën e dytë u klasifikua e dhjeta (54.81 sekonda), koha totale i mjaftoi për të ruajtur vendin e dytë në renditje.
Ky është një tjetër sukses i madh për skitaren që përfaqëson Shqipërinë, pas medaljes së fituar në Levi. Flamuri kuqezi u ngrit sërish në podium, këtë herë në Austri.