Ashtu siç edhe kemi raportuar më herët, “Masakra e Dobraçit” i ka kaluar Prokurorisë së Posaçme, SPAK për hetime të mëtejshme.
Prokuroria e Shkodrës nuk ka asnjë informacion të ri lidhur me masakrën e pak ditëve më parë në Shkodër, ku mbetën të vrarë 4 shtetas.
E vetmja gjë e re e mësuar prej ditësh ishte fakti që prokuroria e Shkodrës nuk do ta mbante më nën hetim dhe do të kalojë dosjen në SPAK. Dhe ndodhi.
SPAK ka nën hetim dosjen “Metamorfoza”, ku janë identifikuar pjesëtarë të grupit Bajri. Dyshohet se dhe atentati mafioz u porosit nga grupi kriminal i njohur në Shkodër për konflikte me familjen Lici.
Prokuroria e Shkodrës ka dyshime se ngjarja është kryer nga një grup kriminal, vepër që është kompetencë e SPAK.
Hamza Lici, shënjestra e atentatit së bashku me Arlind Bushatin humbën jetën gjatë atentatit. Ata u qëlluan me breshëri automatiku nga dy armë zjarri kallashnikov.
Atentati i mori jetën edhe dy të pafajshmëve, burrë e grua Bashkim dhe Flutura Basha. Pas hetimeve, dyshohet se në makinën e viktimave ishte dhe një person i tretë, i cili nuk është gjetur ende nga policia.