Kuvendi i Kosovës dështoi të konstituohet– kriza nis në seancën e parë.
Kuvendi i Republikës së Kosovës zhvilloi seancën konstituive të Legjislaturës së Nëntë, në përputhje me vendimin e presidentes Vjosa Osmani. Seanca u hap nga deputeti më i vjetër, Avni Dehari i Vetëvendosjes, i ndihmuar nga deputetja më e re, Sala Jashari nga PDK.
Në sallë ishin të pranishëm edhe përfaqësues diplomatikë, teksa Dehari theksoi rëndësinë e përfaqësimit të qytetarëve dhe falënderoi të ftuarit për praninë e tyre.
Seanca u fokusua në formimin e Komisionit të përkohshëm për verifikimin e mandateve të deputetëve. Subjektet politike propozuan secila nga një përfaqësues, dhe komisioni miratoi raportin përfundimtar me shumicë votash.
Por pavarësisht këtij konsensusi fillestar, Kuvendi nuk miratoi raportin në seancë plenare: 52 deputetë votuan pro, 46 kundër dhe 11 abstenuan. Si pasojë, Dehari ndërpreu seancën, duke paralajmëruar se Presidentja do të njoftohet për hapat e radhës.
Ndërkohë, Lidhja Demokratike e Kosovës propozoi Kujtim Shalën si nënkryetar të Kuvendit dhe Hykmete Bajramin si shefe të grupit parlamentar, me mbështetjen e kryetarit të partisë, Lumir Abdixhiku.
Por tensionet politike nuk munguan. PDK dhe LDK kërkuan dorëheqjen e Albin Kurtit nga posti i kryeministrit, për shkak të përplasjes së mandatit të tij si deputet dhe si kryeministër në dorëheqje. Abdixhiku e cilësoi këtë situatë si një “episod të errët për demokracinë”.
Konstituimi i Kuvendit mbetet pezull, ndërsa vendi përballet me një klimë politike të tensionuar që në nisje të legjislaturës së re.