Kuvendi i Kosovës ka miratuar me 90 vota pro, një kundër dhe asnjë abstenim një rezolutë që i referohet procesit gjyqësor në Dhomat e Specializuara në Hagë, duke kërkuar garantimin e një gjykimi të drejtë për të akuzuarit.
Rezoluta, e hartuar nga një grup ekspertësh dhe e mbështetur nga Partia Demokratike e Kosovës (PDK), përbën vendimin e parë të legjislaturës së dhjetë të Kuvendit, e cila u konstituua një ditë më parë.
Para votimit, Lidhja Demokratike e Kosovës (LDK) propozoi që dokumentit t’i shtohej një pikë për zbardhjen e vrasjeve para dhe pas luftës. Ky propozim u kundërshtua nga PDK. Deputeti Përparim Gruda deklaroi se partia e tij e ka mbështetur tekstin, por nuk ka qenë hartuese e tij.
Në një nga pikat kryesore të rezolutës, e cila nuk ka fuqi detyruese, u bëhet thirrje Dhomave të Specializuara dhe Zyrës së Prokurorit të Specializuar që, në ushtrimin e funksioneve të tyre, të zbatojnë me përpikëri standardet kushtetuese dhe ndërkombëtare për një proces të drejtë dhe të paanshëm, duke respektuar transparencën, llogaridhënien dhe besimin e publikut në drejtësi.
Sipas Grudës, dokumenti vjen si reagim ndaj shqetësimeve për shkelje të mundshme të të drejtave të të akuzuarve në Hagë. Rezoluta kërkon gjithashtu respektimin e plotë të të drejtave dhe lirive themelore, përfshirë detyrimet që rrjedhin nga jurisprudenca e Gjykatës Evropiane për të Drejtat e Njeriut.
Në tekst theksohet se shtetet që mbështesin dhe financojnë Gjykatën Speciale mbajnë përgjegjësi për çdo shkelje që mund të ndodhë në kuadër të proceseve gjyqësore. Po ashtu, konfirmohet angazhimi i Kosovës për të vijuar mbështetjen financiare të të akuzuarve në funksion të mbrojtjes së tyre.
Miratimi i kësaj rezolute në Kosovë vjen në të njëjtën ditë kur Kuvendi i Shqipërisë miratoi një deklaratë për pafajësinë e ish-eprorëve të UÇK-së që po gjykohen në Hagë.
Të dy dokumentet miratohen në një moment kur procesi gjyqësor ndaj katër ish-eprorëve të UÇK-së në Hagë po hyn në fazën përfundimtare, me mbajtjen e fjalëve përmbyllëse.