Në “Top Arena”, Mateo Borri dhe Brikena Selmani ndanë me publikun momente të veçanta nga historia e tyre e dashurisë. Dy ish-banorët e “Big Brother VIP 5”, të cilët këtë verë moderuan së bashku programin gjatë Botërorit 2026, folën hapur për mënyrën se si ka evoluar lidhja e tyre.
Mateo rrëfeu se puna krah Brikenës i jep një ndjesi të veçantë, por pranoi se shpesh e ka të vështirë të përqendrohet.
“Të jesh me partneren në një program të jep një kënaqësi dhe ngrohtësi tjetër. Vijmë bashkë, bëhemi gati bashkë, gjithçka bashkë. Pjesa e vetme e ‘keqe’ është se kur jam në punë, mendjen e kam tek ty. Më shumë e kam mendjen tek ty sesa tek të ftuarit.”
Nga ana e saj, Brikena e pyeti se cili kishte qenë mendimi i tij i parë kur e pa të hynte në shtëpinë e “Big Brother VIP”.
Mateo kujtoi emocionet e atij momenti, duke treguar se hyrja e Brikenës i ndryshoi plotësisht pritshmëritë për rrugëtimin e tij në reality show.
“Kur të pashë, për një moment m’u mor fryma. Kisha emocione dhe siklete të ndryshme. E kuptova që rrugëtimi im do të ndryshonte komplet. Thuhet se aty ku ka shkëndija, ka edhe zjarr. Unë kisha ardhur me bidona me benzinë, sepse e dija që zjarri ishe ti.”