Evropa po përgatitet për një valë të pazakontë të nxehti, ndërsa meteorologët paralajmërojnë rritje të ndjeshme të temperaturave në ditët e ardhshme. Sipas Shërbimit Meteorologjik “Severe Weather Europe”, mbi pjesën më të madhe të kontinentit po formohet një fenomen i njohur si “kupola e nxehtësisë”, që mund të sjellë temperatura rekord për fundin e muajit maj.
Në disa rajone temperaturat pritet të jenë deri në 15 gradë Celsius më të larta se mesatarja shumëvjeçare. Spanja dhe Portugalia do të jenë ndër zonat më të prekura, ku termometri mund të arrijë nga 35 deri në 39 gradë Celsius.
Masa e ajrit të ngrohtë që po depërton nga Afrika Veriore do të zgjerohet gradualisht drejt Evropës Perëndimore dhe Qendrore. Temperaturat e larta do të përfshijnë edhe Francën, Mbretërinë e Bashkuar dhe disa vende të Evropës Qendrore, ku gjatë pasdites priten vlera nga 25 deri në 29 gradë Celsius.
Meteorologët shpjegojnë se “kupola e nxehtësisë” krijohet kur një zonë me presion të lartë atmosferik bllokon ajrin e nxehtë mbi një territor për një periudhë të gjatë kohe. Ky fenomen shoqërohet me qiell të kthjellët, mot të qëndrueshëm dhe mungesë reshjesh, duke favorizuar rritjen e mëtejshme të temperaturave.
Ekspertët paralajmërojnë se disa pjesë të Evropës mund të përjetojnë ditët e para ekstremisht të nxehta të vitit 2026, ndërsa autoritetet u bëjnë thirrje qytetarëve të shmangin ekspozimin e gjatë në diell dhe të tregojnë kujdes të shtuar ndaj temperaturave të larta.