Kombëtarja shqiptare ka përfunduar përgatitjet për ndeshjen e shumëpritur ndaj Serbisë më 11 tetor në Leskovc. E premte mesditën, skuadra do të niset drejt Nishit, ku do të qëndrojë deri në ditën e takimit.
Seancat stërvitore kanë qenë të mbyllura, ndërsa trajneri Sylvinho ka përgatitur ekipin për këtë sfidë që konsiderohet vendimtare për objektivin e Kombëtares: vendi i dytë në grup.
Pasditen e së premtes, ora 16:30, do të mbahet konferenca e fundit për shtyp nga trajneri Sylvinho dhe një nga lojtarët, në stadiumin e Leskovcit ku zhvillohet ndeshja. Menjëherë pas saj, skuadra do të zhvillojë stërvitjen e fundit në stadiumin Duboçiça.
Presidenti i Federatës Serbe, Dragan Xhajiç, thekson se siguria është prioritet:
“Një incident i vetëm mund të ketë pasoja të mëdha. Po bëjmë gjithçka për ta parandaluar diçka të tillë. Do të ishte katastrofike nëse do të përsëritej dhe mund të përjashtoheshim nga futbolli evropian për një periudhë të gjatë. Për këtë arsye zgjedhëm Leskovcin dhe ulëm kapacitetin e stadiumit. Kjo është një situatë e jashtëzakonshme për ne.”
Ndërkohë, është bërë i ditur edhe emri i arbitrit të ndeshjes: István Kovács, arbitër rumun i klasit “Elite” të UEFA-s, i njohur për përvojën dhe besueshmërinë e tij në futbollin europian. Kovács ka gjykuar finale historike, përfshirë:
UEFA Europa Conference League 2022 (Roma–Feyenoord, Tiranë)
UEFA Europa League 2024 (Atalanta–Bayer Leverkusen, Dublin)
UEFA Champions League 2025 (Paris Saint-Germain–Inter)
Sipas marrëveshjeve të federatave dhe rregullave të UEFA-s, nuk do të lejohet prania e tifozëve shqiptarë në stadium. Ndeshja do të transmetohet drejtpërdrejt dhe ekskluzivisht nga Digitalb.