Kryeministri spanjoll Pedro Sanchez ndodhet në një situatë të vështirë, pasi drejtësia ka hapur një hetim ndaj një zyrtari lokal të Partisë Socialiste (PSOE) të akuzuar për ngacmim seksual, një rast që sfidon imazhin e tij si mbrojtës i luftës kundër krimeve seksuale.
Hetimi paraprak, i kryer nga prokuroria e Malagas, është kundër Antonio Navarro-s, sekretarit të përgjithshëm të PSOE-së në provincën e Torremolinos. Navarro dyshohet se, që nga viti 2021, i ka dërguar qindra mesazhe me përmbajtje seksuale sugjestive dhe të paprovokuara një anëtari tjetër të partisë, paditësit të tij. Sipas gazetës El País, ai dyshohet gjithashtu për gjeste të paprovokuara ndaj të njëjtit person.
Dega lokale e PSOE-së ka kërkuar pezullimin e anëtarësisë së Navarro-s në parti, ndërsa çështja ka rindezur diskutimet pas akuzave të ngjashme kundër ish-këshilltarit Francisco Salajar, i cili u detyrua të jepte dorëheqjen nga zyra e Sanchez në korrik.
Sánchez ka bërë luftën kundër dhunës ndaj grave dhe për barazi një nga prioritetet e qeverisë së tij, duke përfshirë miratimin në vitin 2022 të një ligji emblematik mbi “pëlqimin”. Megjithatë, në muajt e fundit, një seri çështjesh ligjore dhe akuzash për ngacmim seksual kanë rritur presionin mbi kryeministrin, i cili i konsideron këto raste si sulme nga opozita e djathtë dhe ekstremi i djathtë.