Shqipëria po përballet me një krizë serioze në prodhimin e grurit. Të dhënat e fundit nga Drejtoria e Përgjithshme e Doganave dhe INSTAT tregojnë se gjatë vitit 2024 importet e drithërave, sidomos grurit, kanë shënuar rritje të fortë, duke kompensuar rënien drastike të prodhimit vendas.
Gjatë vitit të kaluar, vendi importoi rreth 338 mijë ton drithëra, ku pjesën më të madhe e zë gruri, ndërkohë që prodhimi vendas ra në vetëm 650 mijë ton, nga 701 mijë ton që ishte në 2023.
Rënia më e madhe vihet re tek gruri: nga 234 mijë ton në 2023, prodhimi ra në vetëm 181 mijë ton në 2024. Për krahasim, një dekadë më parë Shqipëria arrinte të prodhonte mbi 280 mijë ton grurë.
Ekspertët e lidhin këtë rënie me disa faktorë: emigracionin masiv që ka boshatisur fshatrat, kostot e larta të prodhimit, mungesën e tregut të garantuar, por edhe mungesën e subvencioneve, ndryshe nga vendet e rajonit që mbështesin fuqishëm fermerët.
Kjo situatë ka sjellë një paradoks: tregu shqiptar është mbushur me grurë të importuar me çmime më të ulëta, duke e ulur çmimin e shitjes në vetëm 3500 lekë për kuintal dhe duke i lënë fermerët vendas pa asnjë motivim për të mbjellë.