Komisioni Qendror i Zgjedhjeve (KQZ) ka shpallur të shtunën rezultatet përfundimtare të zgjedhjeve të parakohshme parlamentare të 28 dhjetorit në Kosovë, pas përfundimit të procesit të rinumërimit të votave.
Anëtarët e KQZ-së kanë miratuar listat e kandidatëve të të gjitha subjekteve politike, me përjashtim të Listës Serbe. Vendimi është marrë me tre vota pro, dy kundër nga përfaqësuesit e Lëvizjes Vetëvendosje, ndërsa anëtarët e tjerë kanë abstenuar. Kryetari i KQZ-së, Kreshnik Radoniqi, bëri të ditur se palët kanë të drejtë ankese brenda 48 orëve në Panelin Zgjedhor për Ankesa dhe Parashtresa (PZAP).
Sipas rezultateve zyrtare, Lëvizja Vetëvendosje ka dalë forcë e parë me 51.10 për qind të votave, duke siguruar 57 ulëse në Kuvend. Partia Demokratike e Kosovës ka marrë 20.19 për qind të votave dhe 22 mandate, Lidhja Demokratike e Kosovës 13.24 për qind dhe 15 ulëse, ndërsa Aleanca për Ardhmërinë e Kosovës 5.50 për qind të votave, duke siguruar gjashtë mandate.
Nga ulëset e rezervuara për komunitetin serb, nëntë mandate i ka fituar Lista Serbe, ndërsa një ulëse i takon Partisë për Liri, Drejtësi dhe Mbijetesë. Dhjetë ulëse të tjera janë të rezervuara për komunitetet joserbe, në përputhje me Kushtetutën e Kosovës, në Kuvendin prej 120 deputetësh.
KQZ-ja i publikoi këto rezultate pas përfundimit të rinumërimit të votave, i cili u krye pas dyshimeve për manipulime në votat e kandidatëve për deputetë. Gjatë procesit, për disa kandidatë u konstatuan ndryshime të konsiderueshme në numrin e votave, në disa raste deri në 6 mijë vota, ndërsa votat për partitë politike nuk u prekën.
Autoritetet e zbatimit të ligjit kanë intervistuar qindra persona, kanë ndaluar dhjetëra të dyshuar dhe po vijojnë hetimet. Disa zyrtarë e kanë cilësuar këtë si një nga proceset më të komprometuara zgjedhore në Kosovë, ndonëse vendi është vlerësuar ndër vite për organizimin e zgjedhjeve të lira dhe transparente.
Sipas njohësve të çështjeve politike, ndër faktorët që mund të kenë ndikuar janë ndryshimi i mënyrës së votimit, numri më i ulët i vëzhguesve dhe fakti që numërimi u krye gjatë ditëve të festave të fundvitit. Partitë politike kryesore kanë dënuar çdo tentativë manipulimi dhe kanë kërkuar ndëshkimin e përgjegjësve.
Sipas Kodit Penal të Kosovës, manipulimi i qëllimshëm i votës apo i rezultatit zgjedhor përbën vepër penale dhe dënohet me deri në pesë vjet burgim.
Me certifikimin e rezultateve, hapet rruga për formimin e institucioneve të reja. Kryeministri në detyrë, Albin Kurti, dhe Lëvizja Vetëvendosje pritet ta formojnë qeverinë e re, ndërsa vetë Kurti ka theksuar se do të nevojitet një raport i ri mes pushtetit dhe opozitës për çështje të rëndësishme, përfshirë zgjedhjen e presidentit dhe miratimin e marrëveshjeve ndërkombëtare.