TIRANË– Kolegji i Posaçëm i Apelimit, shpalli vendimin për lënien në fuqi të konfirmimit në detyrë të gjyqtares së Apelit të Juridiksionit të Përgjithshëm, Iliba Bezati. Kryesuesja Rezarta Schuetz gjatë shpalljes së vendimit ka sqaruar se përllogaritja e shpenzimeve jetike të subjektit është kryer sipas referencave të ILDKPKI.
Sipas saj KPA ka konsideruar si të ardhura të ligjshme ato të përfituara nga dhënia me qira e një apartamenti në Tiranë, si dhe nga shitja e librit universitar nga bashkëshorti, megjithëse detyrimet tatimore nuk janë paguar në kohën e duhur. Kolegji u shpreh se mbante në konsideratë se këto të ardhura janë krijuar me burime të ligjshme.
Bezati u konfirmua në detyrë më 1 mars 2021, pasi u rrëzuan dy raporte negative të institucioneve ndihmëse ndaj saj për pasurinë dhe figurën. Komisioni vlerësoi se Bezati nuk mbante përgjegjësi mbi ligjshmërinë e burimit të të ardhurave të vjehrrës që kishin shërbyer si burim kryesor i pasurisë së saj.
Njoftim vendimi
Trupi gjykues i Kolegjit të Posaçëm të Apelimit, i përbërë nga gjyqtarët Rezarta Schuetz kryesuese, Sokol Çomo relator, Ina Rama, Natasha Mulaj, Albana Shtylla anëtarë, shpalli vendimin për çështjen nr. 29/2021, datë 28.05.2021, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 352, datë 01.03.2021, që lidhet me subjektin e rivlerësimit Iliba Bezati.
Në përfundim të gjykimit, trupi gjykues, bazuar në nenin 66, pika 1, shkronja “a” e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:
Lënien në fuqi të vendimit nr. 352, datë 01.03.2021 të Komisionit të Pavarur të Kualifikimit dhe që i përket subjektit të rivlerësimit Iliba Bezati.
Ky vendim është përfundimtar dhe ka efekt të menjëhershëm.
U shpall sot, më datë 30.07.2024, në Tiranë.