Edhe këtë vit shqiptarët kanë zgjedhur Korçën për të kaluar festat e fundvitit. Operatorët turistikë bëjnë të ditur se hotelet, bujtinat e shtëpitë pritëse janë të rezervuara në qytet dhe fshatrat turistike për Krishtlindje dhe Vitin e Ri.
Ndaj, Sektori i Qarkullimit Rrugor në Drejtorinë Vendore të Policisë së Korçës ka hartuar një plan të posaçëm masash për të garantuar sigurinë rrugore gjatë festave të fundvitit.
Plani synon monitorimin e të gjitha akseve rrugore kombëtare dhe lokale, me fokus të veçantë në rritjen e sigurisë dhe lehtësimin e qarkullimit.
Sipas burimeve zyrtare, në akset kryesore të qarkut do të vendosen 8 patrulla të Policisë Rrugore, ndërsa do të përdoren edhe radarë për të kontrolluar shpejtësinë e automjeteve.
Veç policisë rrugore, kontrolle do të kryhen edhe nga efektivët e Policisë së Rendit, sidomos në qytetet Korçë dhe Pogradec, ku priten lëvizje më intensive të mjeteve dhe qytetarëve.
Policia i bën thirrje drejtuesve të automjeteve që të respektojnë rregullat e qarkullimit, të shmangin shpejtësinë e lartë dhe të përdorin rrugët alternative, si unazat e qyteteve, për të shmangur fluksin e madh në rrugët kryesore.
Qëllimi i këtij plani është rritja e sigurisë dhe shmangia e aksidenteve në një periudhë me lëvizje të dendur.
Policia e Korçës siguron qytetarët se masat do të jenë në fuqi deri në përfundim të festave të fundvitit, me kontrolle të përforcuara në pikat më të ngarkuara të qarkut.