Ministria e Infrastrukturës dhe Energjisë ka reaguar zyrtarisht lidhur me mosmarrëveshjet mes kompanive “2A Group” dhe “Mabco”, të cilat kanë marrë përsipër ndërtimin e Aeroportit të Vlorës, por kanë pezulluar punimet për shkak të një konflikti që ka përfunduar në gjykatë.
Përmes një shkrese zyrtare, ministri Enea Karakaçi u ka kërkuar palëve që të gjejnë një zgjidhje brenda 30 ditësh, me qëllim rifillimin e punimeve dhe respektimin e afateve të projektit.
Në dokument theksohet se nëse brenda këtij afati nuk arrihet një marrëveshje mes kompanive, ministria do të ndërmarrë masa në përputhje me kontratën dhe legjislacionin në fuqi, përfshirë edhe penalitete ndaj palëve përgjegjëse.
Punimet në aeroportin strategjik të Vlorë janë konsideruar me rëndësi të veçantë për infrastrukturën dhe turizmin në jug të vendit, ndërsa vonesat aktuale kanë ngritur shqetësime për respektimin e afateve të ndërtimit.
