Një tjetër goditje ndaj krimit të organizuar është shënuar falë bashkëpunimit mes Policisë së Shtetit dhe partnerëve ndërkombëtarë. Në Paris është arrestuar 50-vjeçari shqiptar P. D., i shpallur në kërkim nga SPAK për trafik ndërkombëtar droge dhe pastrim parash.
Ai dyshohet si pjesë e një rrjeti kriminal që tentoi të trafikonte 1 ton e 16 kilogramë Cannabis Sativa nga Shqipëria drejt Italisë përmes rrugës detare. Ngarkesa u kap në Bari nga autoritetet italiane, ku u ndaluan edhe dy bashkëpunëtorë të tjerë.
Arrestimi i tij u bë i mundur falë operacionit ndërkombëtar “The Wanted”, i koordinuar nga Interpol Tirana dhe policia franceze, pas një shkëmbimi të shpejtë informacioni me strukturat e specializuara shqiptare.
Gjykata e Posaçme kundër Korrupsionit dhe Krimit të Organizuar ka caktuar për të masën “arrest në burg”, ndërsa po përgatiten procedurat për ekstradimin në Shqipëri, ku do të përballet me drejtësinë.