Operacion antidrogë Ekuador–Spanjë: Sekuestrohen qindra kg kokainë, mes të arrestuarve edhe shqiptarë
Një operacion i madh antidrogë, i koduar “Gran Fénix 23”, është zhvilluar më 29 maj në qytetet Quito dhe Guayaquil të Ekuadorit, duke çmontuar një rrjet ndërkombëtar trafiku droge që përdorte eksportin e frutave për të dërguar kokainë në Spanjë.
Operacioni, i kryer në bashkëpunim me Prokurorinë dhe Policinë Kombëtare Ekuadoriane, çoi në 13 arrestime, përfshirë 3 efektivë policie në detyrë aktive, si dhe identifikimin e disa shtetasve shqiptarë në Spanjë që dyshohet se kishin rol logjistik në transportin e drogës përmes rrugëve detare.
Hetimet nisën që në vitin 2024 në koordinim me autoritetet spanjolle, pas kapjes së një ngarkese me kokainë në Madrid më 15 gusht, çka çoi në nisjen e “Operacionit Dragon” në territorin evropian.
Kokaina ishte fshehur në kontejnerë me fruta tropikale pitahaja, duke u mbuluar përmes një zinxhiri tregtar legjitim. Autoritetet zbuluan se operacioni kriminal ishte i mbështetur nga zyrtarë publikë dhe kompani sigurie, ndërkohë që po hetohet një lidhje e mundshme me grupin e njohur kriminal ekuadorian “Chone Killers”.
Në Spanjë janë kryer edhe 4 arrestime të tjera, dhe hetimet po zgjerojnë fushën e tyre për të zbuluar të gjithë rrjetin ndërkombëtar të përfshirë.
Ministria e Brendshme e Ekuadorit ka theksuar se ky operacion është pjesë e një strategjie të re për të goditur rrënjësisht organizatat kriminale që e përdorin Ekuadorin si nyje kyçe në trafikun ndërkombëtar të drogës.